Marina Café Noir | Sardo
591
page-template,page-template-full_width,page-template-full_width-php,page,page-id-591,ajax_fade,page_not_loaded,,qode-title-hidden,transparent_content,qode-theme-ver-13.5,qode-theme-bridge,disabled_footer_bottom,wpb-js-composer js-comp-ver-5.4.5,vc_responsive

Marina Café Noir – Festival di Letterature Applicate
Su festival de Casteddu

Su Marina Cafè Noir – Festival di Letterature Applicate, sa primu Festival literàriu in Sardigna po edadi, est nàsciu in Casteddu in su 2003, in s’apendìtziu stòricu de sa Marina, de sa bidea de una truma de ligidoris e ativistas culturalis, chi agoa s’est adelantada in s’assòtziu culturali Chourmo.

MCN nascit de sa volontadi de apariciai unu Festival biu cumenti a una festa popolari de sa conoscèntzia cumpartzia, innui sa primu ingredienti est sa stòria, de pinnigai e de torrai in sa ia, in sa pratza, in su tzilleri, in sa butega e intra de sa genti etotu.

Unu festival prus abistu a is stòrias e a is autoris, e prus pagu a “is de nous” e a is bestseller, connotu po sa manera sua, chi ponit a pari linguàgius artisticus diferentis inghitzendi de sa literadura: s’assètiu de su Festival est fatu de performance e reading originalis e inèditus chi ndi bessint de is lìburus e de is stòrias.

Partendi de custu e andendi prus a fundu, su MCN est fatu de dibatus, atòbius, bisuras, cuntzertus, spetàculus, laboratòrius, esponiduras, installatzionis e spuntinus in pratza puru, in d-una atmosfera ‘e festa po totus, chen’e diferèntzias de edadi e de logu, ponendi a pari cultura e festa populari.

Unu Festival coscentziosu, de sa ia, populari e po de badas, chi circat de amostai cumenti sa cultura e sa literatura no funt atesu de sa vida de dònnia diì, e sa festa podit e depit fai parti de custu.


Su Progetu

Su Marina Cafè Noir dònnia annu est pesau a giru de unu tìtulu e de unu tema printzipali, chi benit bortau e adelantau in d-unu programa mannu, chi benit portau in scena in su famau apuntamentu printzipali de s’acabu de su mesi de làmpades: un’acab’e cida longu de festa, chi sighit a meda apuntamentus fatus in su cursu de s’annu.

Is argumentus si movint intra de antropologia, stòria, polìtica, sotziali, geografia e arti: in su tzentru sighit at essi su tema de su disterru, de is deretus umanus e tzivilis, de is contra-culturas e contra-economias, de su traballu, de is presonis e de is movimentus contra, de s’ecosostenibilidadi, de is culturas underground e de cussas de resistèntzia.

Su programa s’adelantat intra de atzionis e apuntamentus acapiaus a sa mùsica, a su tiatru, a su tzinema e a is artis de bisura, a is logus, a sa cos’e papai e s’abarrai impari. MCN est unu progetu cunvintu chi, in custu tempu malu, sa literadura e su spainamentu suu iat a depit essi su logu aundi sighiri a fai pensamentus crìticus e utòpicus. Cumenti s’arregordat Paco Ignacio Taibo II, “su mundu est bessiu prus cumpricau, e sa literadura arrennescit a ddu contai; nous nci credeus deaderus. Cumenti credeus deaderus chi si potzat tenni unu lìburu cun d-una manu e una birra cun s’atra, e chi su sabori de sa birra mellorat, e a s’imbressi mellorat fintzas su gustu de su lìburu”.  


Is ospidis de su Marina Cafè Noir

De is Wu Ming a Erri De Luca, de Michela Murgia a Dominique Manotti, de Serge Latouche a Roberto Saviano, de Paco Ignacio Taibo a Nanni Balestrini, de Alan Pauls a Zerocalcare, de Bjorn Larsson a Marc Augè; e aici sighendi Thierry Fabre, Francesco Abate, Marcello Fois, Giulio Angioni, Karim Franceschi, Ezel Alcu, Renè Fregni, Pietro Grossi, Antonella Lattanzi, Loriano Macchiavelli, Giancarlo De Cataldo, Maurizio De Giovanni, Francesco Piccolo, Rita Indiana, Herve Le Corre, Marco Missiroli, Andres Neuman, Antonin Varenne, Enrico Brizzi, Massimo Carlotto, Leonardo Padura Fuentes, Loredena Lipperini, Michel Le Bris, Stefano Tassinari, Silvano Agosti, Gellert Tamas, Sonya Orfalian, Serge Quadruppani; sa lista de is scriidoris, poetas, sagistas, studantis passau in Casteddu po su MCN no acaba prus, chen’e pensai a is musicistas, atoris, registas, fotografus e artistas: Gianmaria Testa, Roy Paci, Max Casacci, Louis Sclavis, Paolo Fresu, Massimo Zamboni, Egle Sommacal, i Camillas, Fabrizio Poggi, Pinuccio Sciola, Marco Baliani, Iaia Forte, Sergio Staino, Ivo Milazzo, Tito Topin, Emanuele Crialese, Lorenza Mazzetti, Sebastien Izzo, Pablo Volta, Mimmo Calopresti, Igort, Angelo Monne, Otto Gabos, Paco Roca, Mario Dondero, Uliano Lucas, Kid Millions, Arrogalla e meda atrus. Custu poita, prus de su “noir”, sa spètzia de literadura amada meda de su Festival, funt prus chi atru is stòrias, is fèmias e is òminis chi arrennescint a s’agiudai a cumprendi sa vida, su tzentru de sa bisura de su Festival.